AFFA UNİCEF-lə tərəfdaşlığı əməkdaşlığa çevirdi

Lent.az-ın məlumatına görə, assosiasiyanın inzibati binasında baş tutan mərasimdə sənədə AFFA-nın baş katibi Elxan Məmmədov və UNİCEF-in Azərbaycandakı nümayəndəsi Mark Herevard imza atıb.

Memorandum bir sıra məsələləri özündə ehtiva edir. Qarşılıqlı razılaşmaya əsasən, AFFA və UNİCEF idman vasitəsilə uşaq, yeniyetmə və gəncləri sağlam həyat tərzinə istiqamətləndirmək məqsədilə birgə layihələr həyata keçirəcəklər. Daha çox sayda qızların futbola cəlb olunması, qadın məşqçilərin sayının artırılması üçün müvafiq işlər görüləcək. Futbolla məşğul olan qızlar öz həmyaşıdları arasında uşaq hüquqlarının qorunmasını və sağlam həyat tərzini təbliğ edəcəklər. Bütün regionlarda qızlar arasında futbolun təbliği məqsədilə 17 yaşadək qızlardan ibarət Azərbaycan milli komandasının üzvləri tərəfindən “master-klass”ların, “U-16 UNİCEF qızlar Liqası”nda çıxış edən komandaların iştirakı ilə müxtəlif bölgələrdə oyunların keçirilməsi, həmçinin qızlar üçün yay düşərgələrinin təşkili, bu düşərgələrə valideynlərin və məktəblərin cəlb olunması nəzərdə tutulub.

Qeyd edək ki, 2007-ci il sentyabrın 14-də AFFA ilə UNİCEF arasında tərəfdaşlıq memorandumu imzalanıb. Həmin memorandum çərçivəsində bir sıra layihələr həyata keçirilib.