“Spartak”ın yeni baş məşqçisi müəyyənləşdi

Lent.az-ın “Sovetskiy Sport”a istinadən verdiyi məlumata görə, Moskva “Dinamo”sunun sabiq baş məşqçisi Andrey Kobelev bu postu tutmağa razılıq verib. Kobelevlə 2 illik, yəni, 2012-2013-cü il mövsümünün sonunadək müqavilə bağlanılacaq. Yaxın vaxtlarda yeni baş məşqçi öz köməkçilərini açıqlayacaq. Təyinat barədə rəsmi məlumat hələ verilmir. “Spartak”ın sahibi Leonid Fedun yeni baş məşqçinin aprelin 21-də açıqlanacağını bildirib. O, namizədlər arasında əcnəbi mütəxəssisin də olduğunu deyib, lakin Kobelevin namizədliyini jurnalistlərlə müzakirə etməkdən boyun qaçırıb.

Qeyd edək ki, “Spartak”ın baş məşqçi postu aprelin 18-də boşalıb. Bu vəzifədən istefa verən Valeri Karpin klubun baş direktoru olacaq. Karpinin rəhbərliyi altında “Spartak”ın son matçı aprelin 20-də “Krasnodar”la Rusiya Kuboku qarşılaşmasına təsadüf edəcək.

Andrey Kobelev isə 2006 – 2010-cu illərdə “Dinamo”nun baş məşqçisi olub. Onun dövründə “Dinamo” 2008-ci ildə Rusiya çempionatının bürünc medallarını qazanıb. Kobelev aprelin 21-dən “qırmızı-ağlar”ı ilk məşqə çıxaracaq.