Səyavuş Novruzov: “Bu, inkişaf yolunda atılan çox inamlı addımdır”

Lent.az-ın klubun rəsmi saytına istinadən verdiyi məlumata görə, millət vəkillərindən formalaşan komandanın heyətində Fazil Qəzənfəroğlu, Səyavuş Novruzov, Azay Quliyev, Etibar Hüseynov, Zahid Oruc, Adil Əliyev, Xanlar Fətiyev, Asəf Haciyev, Qüdrət Həsənquliyev yer alıb.

Veteran futbolçuların komandasında isə Musa Qurbanov, Asim Xudiyev, Oqtay Abdullayev, Nazim Əliyev, Şahin Diniyev çıxış edib. Adətən, yoldaşlıq qarşılaşmasının nəticəsi elə də önəmli sayılmır. Bununla belə meydanda əsl mübarizə gedib. Sonda isə dostluq qalib gəlib.

Oyundan sonra millət vəkillərindən ibarət komandanın kapitanı, YAP gənclər təşkilatının sədri Səyavuş Novruzov fikirlərini belə ifadə edib: “Bakı” futbol klubu Azərbaycanda azarkeşlik etdiyim klublardan biridir. Mütəmadi olaraq bu klubun oyunlarında iştirak edirəm. Qeyd edim ki, klub istər Avropa, istərsə də ölkədaxili yarışlarda layiqincə çıxış edir. Bu gün “Bakı”nın təlim-məşq bazası ilə tanış oldum. Cəmi 18 ay ərzində Azərbaycanda belə bir möhtəşəm idman kompleksi yaradılıb. Bu, inkişaf yolunda atılan çox inamlı addımdır. Başda klub prezidenti olmaqla bütün kollektivinizə, məşqçi heyətinə təşəkkürümüzü bildiririk ki, el-el, oba-oba gəzərək ümidverən yeniyetmələri, gəncləri bura toplamısınız, onların idmanla məşğul olması üçün şərait yaratmısınız. Bütün futbolçulara seçdikləri çətin peşədə böyük uğurlar arzu edirəm”.