Hakimi yumruqlayan erməni boksçu cəzalandırıldı

Lent.az-ın “fightnews.com”a istinadən verdiyi məlumata görə, insident aprelin 9-da onun Robert Ştiqlitslə döyüşündən dərhal sonra baş verib.

Döyüşün 10-cu raundunda Gevor diskvalifikasiya edilib. O, hakim Manfred Küxlerə bir neçə zərbə endirdikdən sonra təhqir etməyə başlayıb. Əsl adı Gevorqyan olan Xoren Gevor Ermənistan əsilli olsa da, Almaniyada çıxış edir. O, Robert Ştiqlitslə WBO (Ümumdünya Boks Təşkilatı) versiyası üzrə 76,2 kq çəki dərəcəsində döyüşüb. Gevorun diskvalifikasiyası üzündən Ştiqlits döyüşün qalibi elan olunub. Döyüş ərzində Küxler erməni boksçuya kobudluğu ilə əlaqədar bir neçə dəfə xəbərdarlıq edib. Diskvalifikasiyaya səbəb rəqiblərin birgə yerə yıxılması zamanı kəllə-kəlləyə toqquşması olub. Həmin epizodda Ştiqlitsin üzündən güclü qan açılıb. Referi isə insidentin günahkarı qismində Gevoru görüb.

Aprelin 12-də erməni boksçu hakimdən rəsmən üzr istəyərək, öz hərəkətini yolverilməz adlandırıb. Bununla belə, Gevor Ştiqlitsin üzündən açılan qanda özünü günahkar görmədiyini vurğulayıb. 6 aylıq diskvalifikasiyanı Almaniya Boks Federasiyası çıxarıb. Federasiya prezidenti Tomas Püts cəzanın yüngüllüyünü Küxlerin Gevorun üzrxahlığını qəbul etməsi və boksçunu həddən artıq ciddi cəzalandırmamaq xahişi ilə əlaqələndirib.