Hiddink “Çelsi”yə buraxılmadı

Lent.az-ın məlumatına görə, bu barədə Türkiyə Futbol Federasiyasının (TFF) rəsmisi Türkər Tazar “Daily Telegraph”a bildirib.

Tazar qeyd edib ki, TFF ötən həftə Hollandiya “Ayaks”ına da rədd cavabı verib. Onun sözlərinə görə, Hiddinkin federasiya ilə müqaviləsi yığmada və klubda iki işi yerinə yetirməsinə imkan vermir: “Bu, müqavilənin konkret bəndidir və TFF prezidenti onu dəyişməyə hazırlaşmır. Biz anlayırıq ki, Roman Abramoviç kimi insanlar Hiddinki diqqətdə saxlayırlar. Lakin istənilən təklif tərəfimizdən geri çevriləcək. Siz onun karyerasına nəzər yetirsəniz, hollandiyalı mütəxəssisin daim müqaviləsini sonadək yerinə yetirdiyini görərsiniz. Bundan başqa Hiddink bizə deyib ki, Türkiyə yığması onun karyerasında son iş yeri ola bilər. Biz istərdik ki, o millimizi 2014-cü il dünya çempionatının final mərhələsinə çıxarsın”.

Qeyd edək ki, Türkiyə yığması 2012-ci il Avropa çempionatının seçmə qrup mərhələsində Azərbaycan millisi ilə eyni qrupda yer alıb. Bakıdakı görüşdə millimiz 1:0 hesabı ilə qalib gəlib. Qardaş ölkədəki qarşılaşma isə 11 oktyabrda keçiriləcək.