Çempionlar Liqası: “Barselona” və “Mançester Yunayted” yarımfinala yaxınlaşdı

Lent.az-ın məlumatına görə, ikinci oyun günündə daha 2 qarşılaşma baş tutub.

İngiltərənin iki klubu – “Çelsi” və “Mançester Yunayted” arasında keçirilmiş matçda qonaqlar qələbə qazanıb. İlk yarıda Ueyn Runinin vurduğu qol oyunda yeganə olub. Beləliklə, “qırmızı şeytanlar” cavab görüşü üçün böyük üstünlük əldə ediblər.

İspaniyada “Barselona” ilə Ukrayna “Şaxtyor”unu üz-üzə gətirən görüşdə isə böyük hesab qeydə alınıb. Kataloniyalılar hələ 2-ci dəqiqədə hesabı açaraq rəqibin müqavimət qüvvəsini sarsıdıblar. Hesab 3:0 olarkən, “Şaxtyor” fərqi azaltsa da, buna peşman olub. Daha 2 qol vuran “Barsa” 5:1 hesabı ilə qalib gəlib. Bununla da baş məşqçi Xosep Qvardiolanın komandası yarımfinala vəsiqə məsələsini demək olar ki, ilk görüşdəcə həll edib.

“Barselona” (İspaniya) – “Şaxtyor” (Ukrayna) – 5:1
Andres İnyesta, 2. Daniel Alves, 34. Xerard Pike, 53. Seydu Keyta, 60. Xavi Ernandes, 86 - Yaroslav Rakitski, 59

“Çelsi” (İngiltərə) – “Mançester Yunayted” (İngiltərə) - 0:1
Ueyn Runi, 24

Qeyd edək ki, aprelin 5-də keçirilmiş daha iki ¼ final matçı böyük hesabla nəticələnib:

“İnter” (İtaliya) – “Şalke 04” (Almaniya) - 2:5
Deyan Stankoviç, 1. Qabriel Milito, 34 - Joel Matip, 17. Edu, 40; 75. Raul, 53. Andrea Ranokkiya, 57-avt.
Qırmızı vərəqə: Kristian Kivu, 62 (“İnter”)

“Real Madrid” (İspaniya) – “Tottenhem” (İngiltərə) - 4:0
Emmanuel Adebayor, 4; 57. Anxel Di Mariya, 72. Kriştianu Ronaldu, 87
Qırmızı vərəqə: Piter Krauç, 15 (“Tottenhem”)

Cavab görüşləri aprelin 12-də və 13-də keçiriləcək.