“Mahir Şükürov kimi futbolçulara “Neftçi”nin ehtiyacı var”
06 aprel 2011 18:48 (UTC +04:00)

“Mahir Şükürov kimi futbolçulara “Neftçi”nin ehtiyacı var”

“Bunu gizlətməyin mənası yoxdur. Mahir Şükürov kimi futbolçulara “Neftçi”nin ehtiyacı var. Lakin indiyədək Şükürovla danışığımız olmayıb”.


Bunu Lent.az-a açıqlamasında “Neftçi”nin prezidenti Sadıq Sadıqov deyib. Sadıqov bildirib ki, Azərbaycanın şərəfini qoruyan hər bir futbolçu üçün “Neftçi”nin qapısı açıqdır: “Şükürov da yığmamızın oyunçudur və çox səviyyəli də oyunçudur. Sadəcə, Rusiyanın “Anji” klubu ilə problemlər yaşayıb, hətta müqaviləsinin pozulduğunu da deyirlər. Yəqin ki, növbəti transfer dövründə onunla oturub danışacağıq. Biləcəyik ki, nə var-nə yox. Amma hazırda Şükürovla “Neftçi”yə transferi istiqamətində heç bir söhbət aparmamışıq”.

Klub prezidenti bildirib ki, Şükürov “Anji”də zədələndikdən sonra yığmamızın baş məşqçisi Berti Foqtsun “Neftçi”dəki həmkarı Arif Əsədovdan xahişi əsasında flaqmanın məşqlərinə qatılıb. Futbolçunun komanda ilə birgə məşqləri üçün lazımi şərait yaradılıb: “Mahir bazamıza gəldi, komanda üzvləri tərəfindən çox yüksək səviyyədə qarşılandı və kollektivlə birgə məşq etdi. Şükürov bu gün heç yerdə məşq etmirsə və saytlarda yazıldığı kimi, voleybolla məşğuldursa, yenə deyirəm, “Neftçi”nin qapısı onun üzünə açıqdır. Yəqin ki, Arif müəllim də mənimlə həmfikirdir. Mahir formasını qorumaq üçün məşq edə bilər. Lakin bu, o demək deyil ki, Şükürov “Neftçi” ilə məşq edirsə, gələcəkdə də komandamızın oyunçusu olacaq. Hələ bu haqda danışıqlar olmayıb. Amma bir oyunçu kimi onun “Neftçi”də yeri var və bazamızda məşq etməsinə problem yoxdur. Gəlib, komandamızla birgə məşq prosesində iştirak edə bilər”.

Elşən MƏMMƏDOV
# 475

Oxşar yazılar