“Everton” “Neftçi”yə Araz Abdullayevin transfer haqqını köçürüb

Bu barədə Lent.az-a flaqmanın prezidenti Sadıq Sadıqov məlumat verib. Onun sözlərinə görə, bu transferlə bağlı “Everton”dan “Neftçi”yə maliyyə vəsaiti də köçürülüb, heç bir problem yoxdur. Lakin Sadıqovun fikrincə, Böyük Britaniyaya işçi vizasını ala bilməsi üçün Abdullayevin Azərbaycan millisində oynaması çox vacibdir: “Araz heç olmasa, 10-15 dəqiqə müddətinə yığmanın oyununa buraxılmalıdır. Belçika ilə son görüşdə onun da oynayacağını gözləyirdik. Amma nə isə alınmadı”.

Abdullayevin yayadək “Neftçi”də icarədə olduğunu xatırladan klub prezidenti futbolçunun artıq “Everton”a məxsusluğunu diqqətə çatdırıb: “İngiltərə klubu ilə ikitərəfli müqaviləmiz var. “Everton” Arazı bizdən alıb və bizə 6 aylıq icarəyə verib. Futbolçunun icarə müddəti başa çatdıqdan sonra yüz faiz “Everton”un düşərgəsinə gedəcək. Amma İngiltərə klubunun onu hansı mövqedə və ya hansı komandasında oynadacağını deyə bilmərəm”.