Çempionlar Liqası: “Rabitə” Ziya Məmmədov və Əli Abbasovun gözləri önündə finala yüksəldi

Lent.az-ın məlumatına görə, Azərbaycan çempionu Türkiyənin İstanbul şəhərində keçirilən “dördlər finalı” çərçivəsində oynadığı yarımfinal qarşılaşmasında İtaliyanın “Skavolini” komandasını məğlubiyyətə uğradıb – 3:1.

Nəqliyyat naziri və Azərbaycan Voleybol Federasiyasının prezidenti Ziya Məmmədovla rabitə və informasiya texnologiyaları naziri Əli Abbasovun da canlı izlədiyi görüşün ilk seti gərgin mübarizə şəraitində keçib. Lakin sonda voleybolçularımız üstün olublar – 25:23. İkinci setdə “Rabitə” daha böyük fərqlə qalib gəlib – 25:16. Üçüncü setdə “Skavolini” üstünlüyü ələ alaraq daha böyük fərqlə qələbəyə nail olub – 25:13. Lakin İtaliya təmsilçinin bundan artığına gücü çatmayıb. Dördüncü setdə “Rabitə” 25:14 hesablı üstünlüklə görüşün qalibi olub. Beləliklə, baş məşqçi Deyan Brdjoviçin komandası Çempionlar Liqasında debüt mövsümündəcə həlledici oyunda iştirak hüququna yiyələnib.

“Rabitə”nin finaldakı rəqibi Bakı vaxtı ilə saat 20:00-da Türkiyənin “Fənərbağça” və “Vakıf Günəşbank Sığorta” komandaları arasında başlanacaq görüşün qalibi olacaq. Həlledici oyun martın 20-də baş tutacaq.