AFFA yenidən hakimləri gizlətdi - EKSKLÜZİV

Bu haqda Lent.az-a komitə sədri Xaqani Məmmədov məlumat verib.

Onun sözlərinə görə, XXIV tura təyinat alan 7 əsas və 7 ehtiyat hakim martın 16-dan etibarən təlim-məşq toplantısına cəlb olunacaqlar. Onlar adı gizli saxlanılan oteldə qalaraq, tam sakit şəraitdə oyunlara hazırlaşacaqlar: “Həmin yer heç kimin ağlına gəlməyən məkandadır. Bəzilərinin dediyi kimi, heç də həbsxana deyil. Onların qalacaqları şərait nə sizdə, nə də məndə var”.

Məmmədov onu da bildirib ki, Hakimlər qarşılaşmalara mühafizəçilərin əhatəsində yollanacaqlar. Bu addım hakimləri kənar təzyiqlərdən qorumaq məqsədilə atılıb. Bu proses mövsümün sonuna kimi davam edəcək.

Qeyd edək ki, Unibank Premyer Liqasında növbəti turun oyunları martın 17-də və 18-də keçiriləcək. Son illərin ən prinsipial rəqibləri sayılan “Xəzər Lənkəran”la “Neftçi” arasındakı qarşılaşma da məhz XXIV tura təsadüf edəcək.

Elşən MƏMMƏDOV