Berti Foqts: “Onlar qərarları tez qəbul etməyi öyrənməlidirlər”

Lent.az-ın məlumatına görə, Foqts əvvəlcə yanvarın 27-dən başlanan təlim-məşq toplanışı üçün komandamıza yüksək səviyyədə şəraitin yaradıldığını bildirib.

Hazırlığa gəlincə, baş məşqçi futbolçuların ləng qərar verməsindən şikayətlənib: “Oyunçular başa düşməlidirlər ki, onlar ölkə çempionatına yox, beynəlxalq oyunlara hazırlaşırlar. Meydanda topu ələ keçirən zaman tez qərar qəbul etmək lazımdır. Ancaq onların çox fikirləşməsi vaxt itkisinə səbəb olur. Nəticədə müdafiədən hücuma gec keçməyimiz məndə narazılıq yaradır”.

Foqtsun fikrincə, millimizin iki aydır hazırlıq keçmədiyi hiss olunur. Lakin yığmamızın baş məşqçisi bildirib ki, buna görə klubların Türkiyənin Antalya şəhərindəki hazırlığının pis keçdiyini demək olmaz: “Hər şey futbolçuların özlərindən asılıdır. Onlar qərarları tez qəbul etməyi öyrənməlidirlər”.

Daha sonra 65 yaşlı mütəxəssis yığmamızın fevralın 9-da Macarıstan millisi ilə keçirəcəyi yoldaşlıq görüşü barədə danışıb. O bildirib ki, 10-12 günlük toplanışla Macarıstan yığmasına böyük hesabla qalib gələcəyimizi gözləmək düzgün olmaz: “Rəqibin heyətindəki futbolçuların böyük əksəriyyəti Avropada oynayırlar. Onlar İtaliya, İngiltərə, Almaniya kimi güclü çempionatlarda çıxış edirlər. Bəs azərbaycanlı futbolçular belə liqalarda oynayırlarmı? 10-12 günlük toplanışla Macarıstan yığmasına böyük hesabla qalib gələcəyimizi gözləmək düzgün olmaz”.