Gürcüstan gömrükçüləri Azərbaycan klubunu böyük məbləğdə cərimələdi
31 yanvar 2011 19:13 (UTC +04:00)

Gürcüstan gömrükçüləri Azərbaycan klubunu böyük məbləğdə cərimələdi

Lent.az-ın klubun rəsmi saytına istinadən verdiyi məlumata görə, “Turan” Türkiyənin Antalya şəhərində keçirdiyi təlim-məşq toplantısını başa vuraraq, yanvarın 30-da gecə saatlarında Vətənə dönərkən gömrük postunda 4 saatadək saxlanılıb.

Gürcüstan sərhədçiləri avtobusla bağlı problemin olduğunu bildiriblər. Onlar Batumidə yük yerinə vurulmuş möhürlərdən birinin zədələndiyini söyləyiblər. Çox həssas materialdan ibarət, ən adi şəraitdə belə zədələnə biləcək kağız parçasının çətin hava şəraitində zədələnməməsi qeyri-mümkündür. “Turan” rəsmiləri bunu Gürcüstan gömrükçülərinə izah etməyə çalışsalar da, müsbət nəticə əldə edə bilməyiblər. Əksinə, gömrük əməkdaşları klubu böyük məbləğdə cərimələməkdən çəkinməyiblər.

Üstəlik, onlar “Turan”ın əməkdaşları ilə olduqca sərt və vəzifə həddini aşan formada davranıblar. Gömrükçülər komandanın rəisi İman Həsənov və avtobusun sürücüsü Gündüz Qasımovu həbs etməyə cəhd göstəriblər. Məsələ ilə bağlı qonşu dövlətin aidiyyatlı orqanlarına müraciətlərə baxmayaraq sıralarında 4 gürcü futbolçunun olduğu “Turan” klubuna terrorçu qruplaşma kimi davranmalarına izah tapılmayıb. Yalnız böyük məbləğdə cərimələndikdən sonra komanda gömrük postundan buraxılıb.

“Turan” klubu məsələ ilə bağlı lazımi tədbirlərin görülməsi, düzgün hüquqi qiymətin verilməsi üçün yerində toplanan bütün faktlar əsasında əlindən gələni edəcəyinə söz verib.
# 481

Oxşar yazılar