“Australian Open”: Şarapova – Uilyams görüşü baş tutmadı

Lent.az-ın məlumatına görə, buna rusiyalıdan fərqli olaraq, ABŞ tennisçisinin dördüncü mərhələyə yüksələ bilməməsi səbəb olub.

Uilyams almaniyalı Andrea Petkoviçlə qarşılaşmada 0:1 hesabı ilə geridə olduğu vaxt sağ ayağındakı zədə ilə əlaqədar mübarizədən imtina edib. Əvəzində Şarapova digər almaniyalı Yuliya Görgesi yenməyi bacarıb – 6:4, 4:6, 6:4. Növbəti mərhələdə o, Petkoviçlə qarşılaşacaq.

Belçikalı Jüstin Enen isə rusiyalı Svetlana Kuznetsovaya uduzub – 4:6, 6:7 (8:10). Danimarkalı Karolin Voznyaçki slovakiyalı Dominika Tsibulkovanı 6:4, 6:3, italiyalı Françeska Skyavone rumıniyalı Monika Nikuleskunu 6:0, 7:6 (7:2) hesabı ilə yenib.

Kişilərin fərdi yarışında isveçrəli Roje Federer belçikalı Xavyer Malisseni üstələyib – 6:3, 6:3, 6:1. Federerin dördüncü mərhələdə rəqibi ispaniyalı Tommi Robredo olacaq. ABŞ tennisçisi Endi Roddik hollandiyalı Robin Haası çətinliklə məğlub edib – 2:6, 7:6 (7:2), 6:2, 6:2. Roddik növbəti mərhələdə isveçrəli Stanislav Vavrinka ilə üz-üzə gələcək.

Serbiyalı Novak Cokoviç həmyerlisi Viktor Troitski ilə qarşılaşmada rəqibinin ilk setdən sonra mübarizəni dayandırması üzündən mərhələ adlayıb.