“Çelsi”yə yeni baş məşqçi təyin olundu

Lent.az-ın klubun rəsmi saytına istinadən verdiyi məlumata görə, bu, ispaniyalı Rafael Benitesdir.

52 yaşlı mütəxəssislə mövsümün sonunadək anlaşma əldə edilib. O, komandaya noyabrın 22-də təqdim olunacaq. Əvvəlki baş məşqçi Roberto Di Matteo qeyri-qənaətbəxş nəticələri ilə əlaqədar ötən gün istefaya göndərilib. Benites Roman Abramoviçin klubunda son 9 ildə 9-cu baş məşqçi olacaq.

Qeyd edək ki, “Çelsi” 2012-2013-cü il mövsümünə uğurla başlasa da, sonradan uğursuz oyunlar seriyası keçirib. İngiltərə Premyer Liqasındakı son 4 matçda “zadəganlar” qələbəyə həsrət qalıblar. 12 turdan sonra klub 3-cü yerdə qərarlaşıb. Çempionlar Liqasında isə “Çelsi” 1/8 finala vəsiqə şanslarını demək olar ki, itirib. Halbuki Roberto Di Matteo 2012-ci ilin martında komandaya baş məşqçi təyin olunduqdan sonra ötən mövsüm Çempionlar Liqası və İngiltərə Kubokunu qazanıb. Rafael Benites isə əvvəllər İspaniyanın “Valensiya” klubuna İspaniya çempionluğu və UEFA Kubokunu, İngiltərə “Liverpul”una İngiltərə Kuboku və Superkuboku, Çempionlar Liqası və UEFA Superkubokunu, İtaliya “İnter”inə isə İtaliya Superkuboku və klublararası dünya çempionluğunu qazandırıb.