PFL-dən qiyamət günü açıqlaması

Qurumun Mətbuat və İctimaiyyətlə Əlaqələr Departamentinin rəisi Aslan Şahgəldiyev Lent.az-a açıqlamasında bunu təqvimdə edilən dəyişikliklə əlaqələndirib.

O bildirib ki, indi təqvimdə dekabrın 22-də keçiriləcəyi göstərilən “Neftçi” – AZAL və “İnter” – “Bakı” matçları bir gün tez baş tutmalı imiş. Lakin I turdan təxirə salınmış “Neftçi” – “Bakı” matçının dekabrın 18-ə təyin edilməsindən sonra dəyişiklik baş verib: “Bu iki komandanın növbəti paytaxt derbilərinə hazırlaşmağa daha çox vaxtının olması üçün belə etdik. Əslində əksər ölkələrdə bir oyunla digəri arasında 3 gün vaxt qoyulur. Hətta İngiltərə Premyer Liqasında dekabrın 31-də oyun keçirilir və növbəti tur yanvarın 2-ə təyin edilir. Amma bizim klublar yorğunluqdan şikayətlənirlər. Ona görə də oyunlararası intervalı 4 günə çatdırdıq”.

Qeyd edək ki, el arasında “qiyamət günü” kimi göstərilən 21 dekabra oyunun salınmaması müəyyən şübhələrə yol açıb. Ehtimal olunur ki, çempionatın təşkilatçısı PFL-in həmin gün hər hansı hadisənin baş verəcəyindən ehtiyatlanıb.

Elşən MƏMMƏDOV