Şimali İrlandiya yığmasında 5-ci itki - FOTO

Şimali İrlandiya milli komandası noyabrın 14-də Azərbaycan yığması ilə keçirəcəyi 2014-cü il dünya çempionatının seçmə qrup matçına daha bir itki ilə çıxacaq. Lent.az-ın İrlandiya Futbol Assosiasiyasının rəsmi saytına istinadən verdiyi məlumata görə, bu dəfə Qrant Makkan heyətdən kənarlaşdırılıb.

O, ailə problemləri ilə əlaqədar yığmanın düşərgəsini tərk edib. Bununla da 32 yaşlı yarımmüdafiəçi 40-cı oyununu Azərbaycana qarşı keçirmək imkanından məhrum olub. Baş məşqçi Maykl O Neil İngiltərənin “Peterboro Yunayted” klubunda çıxış edən futbolçunun əvəzinə yenisini çağırmayıb.

Qeyd edək ki, əvvəllər Conni Evans, Endryu Litl, Aleks Bryus və Ceymi Uord zədə səbəbindən heyətdən kənarlaşdırılıblar. Əvəzində İngiltərənin “Börnli” və “Liverpul” klublarından Daniel Lafferti və Rayan Makloflinə dəvət göndərilib. Belfast şəhərindəki “Windsor Park”da keçiriləcək Şimali İrlandiya – Azərbaycan matçı Bakı vaxtı ilə saat 23:45-də başlanacaq.