İdman dırmanması üzrə Açıq Respublika Çempionatı başladı

Sentyabr 29-da Gənclər və İdman Nazirliyinin 2012-ci il üzrə Təqvim Planında nəzərdə tutulan idman dırmanması üzrə Açıq Respublika Çempionatına start verilib. Çempionat Azərbaycan Hava və Ekstremal İdman növləri Federasiyasının (FAIREX) təşkilatçılığı ilə keçirilir.

Federasiyanın mətbuat xidmətindən Lent.az-a verilən məlumata görə, yarışda iştirak etmək üçün FAIREX-in ölkəmizin müxtəlif bölgələrini təmsil edən 23 idman klubundan 90-dan artıq idmançı qeydiyyatdan keçib. Çempionata Gürcüstandan gəlmiş idmançılar da qoşulub. Yarış 2 gün ərzində 3 növ - boulderinq (qısa mürəkkəb məsafələrdə), sürət və çətinlik üzrə Beynəlxalq İdman Dırmanması Federasiyasının (IFSC) standart və qaydalarına uyğun olaraq keçiriləcəkdir. Yarışa FAIREX tərəfindən xüsusi hazırlıq kursu keçən 20-dən artıq idmançı hakimlik edəcək.

29 sentyabr 2012-ci il tarixində idmançılar qeyd olunan 3 növ üzrə təsnifat yarışlarında qüvvələrini sınayacaq, 30 sentyabr 2012-ci il tarixində isə yarımfinal və final yarışları keçiriləcəkdir.

Jalə