“Kəpəz”ə yeni baş məşqçi təyin olundu - FOTO

Bu gün Kəpəz PFK-nın prezidenti Elmir Əliyev komandanın baş məşqçisi Fuad İsmayılovla görüşüb, onun istefasını qəbul edib və təcrübəli məşqçiyə uğurlar arzu edib. Lent.az bu barədə klubun mətbuat xidmətinə istinadən məlumat yayıb. Məlumata görə, Kəpəzin rəhbərliyi artıq yeni baş məşqçini də təyin edib. Bundan sonra Kəpəz komandasını Premyer Liqa yarışlarına Gəncənin yetirməsi olan, bir qədər bundan əvvəl Tərəqqi klubuna baş məşqçi təyin olunmuş Mahmud Qurbanov hazırlayacaq.

Təyinatdan dərhal sonra Elmir Əliyev, Mahmud Qurbanov və Fuad İsmayılov birlikdə görüşərək ümumi məsələləri müzakirə ediblər. İsmayılov gənc və perspektivli Qurbanova gələcək fəaliyyətində uğurlar arzulayıb.

Klubun prezidenti bildirib ki, ki, Mahmud Qurbanovun ona göstərilən etimadı doğrultacağına ümidvardır.

“Mən Fuad müəllimə uğurlar arzulayıram. O, çox təcrübəli bir məşqçidir. Lakin bu futboldur və belə şeylər olur. İnanıram ki, İsmayılov bundan sonra da Gəncə futboluna xidmət göstərəcək. Mahmud Qurbanova gəlincə, o, Azərbaycanın ən təcrübəli və güclü futbolçularından olub. Gənc və perspektivlidir. İnanıram ki, onun komandaya baş məşqçi təyin olunması kluba yeni ab-hava gətirəcək” - deyə Elmir Əliyev bildirib.