Xəzərdə partlayıcılarla balıq tutanlar saxlanıldı - VİDEO

Xəzərdə qanunsuz yollarla balıq tutanlar saxlanılıb.

Dövlət Sərhəd Xidmətindən Lent.az-a verilən məlumata görə, Sahil Mühafizəsi tərəfindən keçirilmiş rejim tədbirləri zamanı iyunun 10, 12 və 13-də sərhəd gəmisi tərəfindən Böyük Tava, Kiçik Tava, Çurka, Yal, Dardanel, Qarasu, Gil, Xərə-Zirə, Daşsız, Adsız adaları, həmçinin Kumani və Kornilov-Pavlov bankalarına baxış keçirilib.

İyunun 12-də Sahil Mühafizəsinin texniki müşahidə məntəqəsi və sərhəd gəmisinin qarşılıqlı fəaliyyəti ilə keçirilən rejim tədbirləri nəticəsində Xəzər dənizinin Azərbaycan Respublikası sektorunda, Qaradağ reydində icazəsiz rejim sularına çıxan “ƏL-1431” bort nömrəli kiçikhəcmli üzmə vasitəsinin heyətində şübhəli hallar aşkar edilib.

Keçirilən rejim tədbirləri nəticəsində partlayıcı vasitələrdən istifadə edərək qanunsuz balıq ovu ilə məşğul olan Qaradağ rayon sakinləri Nuriyev Elman Bibiqulu oğlu, Dəmirov Mustafa Babahəsən oğlu və İskəndərov Şəhriyar Aydın oğlu saxlanılaraq Daxili İşlər Nazirliyinin Su Nəqliyyatında Polis İdarəsinin əməkdaşlarına təhvil verilib.