Tanınmış aşıq yol qəzasında öldü

Yanvarın 30-da saat 01:15 radələrində Qaradağ rayonu ərazisindəki Yeni dairəvi yolda bir nəfərin ölümü ilə nəticələnən yol nəqliyyat hadisəsi baş verib. Lent.az-ın məlumatına görə, Bakı şəhər sakini İslam Məmmədov idarə etdiyi "Mercedes" markalı avtomaşını yolun kənarındakı dəmir səddə vurub. Nəticədə İslam Məmmədov aldığı xəsarətdən hadisə yerində ölüb. Hadisə ilə bağlı Qaradağ RPİ tərəfindən araşdırma aparılır.

Məlumata görə, ölən şəxs Şirvan aşıq sənətinin yetirmələrindən olan aşıq İslam Rzaoğludur. Aşıq İslam 1977-ci ildə Şirvanın məşhur aşıqlarından olan Aşıq Rza Qobustanlının ailəsində dünyaya göz açıb. Klassik Şirvan Aşiq musiqilərini ifa edib. O, Musiqi Akademiyasını bitirib. Xalq artisti Arif Babayevdən dərs alıb.

Xalq artisti Lent.az-a açıqlamasında bildirib ki, Aşıq İslam 4 il onun tələbəsi olub: “Bu səhər xəbəri eşitdim. Çox pis oldum. Çox yaxşı, mədəni oğlan idi. Yaxşı səsə malik idi. O, bu gün Qobustanda dəfn olunacaq. Tələbəmin vaxtsız vəfatı müəllim kimi məni çox üzdü” .