Sürət Hüseynova yaxın şəxsin oğlunun şikayəti təmin edilmədi

Bu gün Bakı Apelyasiya Məhkəməsində qətl törətməkdə təqsirli bilinən Minas Əliyevin cinayət işi üzrə məhkəmə prosesi başa çatıb. Lent.az-ın məlumatına görə, hakim Camal Ramazanovun sədrliyi ilə keçirilən prosesdə qərar elan edilib. Hakimlər kolegiyasının qərarına əsasən hər iki tərəfin şikayəti təmin edilməyib.

Qeyd edək ki, ötən il iyulun 19-da Nərimanov rayonu S.Quliyev küçəsində Bakı şəhər sakini Minas Əliyev Abşeron rayon sakini Rahib Şahbazovu bıçaqlayaraq öldürüb. Bakı Ağır Cinayətlər Məhkəməsinin hökmü ilə Minas Əliyev 11 il müddətinə azadlıqdan məhrum edilib. Hökmdən Baş Prokurorluq narazı qalıb. Prokurorluq onun cəzasının ağırlaşdırılmasını istəyib. Hökmdən zərərçəkmiş tərəf və təqsirləndirilən şəxs də apelyasiya şikayəti verib. Zərərçəkmiş tərəfin nümayəndəsi təqsirləndirilən şəxsin cəzasının ağırlaşdırılmasını istəyib. Minas Əliyev isə cəzasının yüngülləşdirilməsini tələb edib.

Onu da qeyd edək ki, Minas Əliyevin atası Vaqif Əliyev Surət Hüseynovun yaxın adamı və onu maliyyələşdirən şəxs olub. V.Əliyev Surət Hüseynovla birlikdə həbs olunaraq 9 il azadlıqdan məhrum edilib. Lakin 3 il sonra azad edilib. Azadlığa çıxandan az sonra isə o vəfat edib.