Sirac Kərimovun məhkəməsi başladı

Bu gün Bakı Ağır Cinayətlər Məhkəməsində narkotik maddələrin qanunsuz dövriyyəsində təqsirli bilinən Müsavat partiyasının üzvü Sirac Kərimovun cinayət işi üzrə məhkəmə prosesinə start verilib. Lent.az-ın məlumatına görə, hakim Əhməd Quliyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Bundan sonra Sirac Kərimovun vəkili Nemət Kərimli müdafiə etdiyi şəxs barəsində seçilmiş həbs-qəti imkan tədbirinin ev dustaqlığı ilə dəyişdirilməsi üçün məhkəməyə vəsatətlə çıxış edib. Bundan sonra hakimlər müşavirəyə gedib. Müşavirədən gələn hakimlər kollegiyası vəsatəti təmin etməyib. Məhkəmə prosesi fevralın 12-də davam etdiriləcək.

Qeyd edək ki, Sirac Kərimli keçən il iyul ayında Daxili İşlər Nazirliyinin Narkotikə Qarşı Baş İdarəsinin əməkdaşları tərəfindən Səbail rayonu ərazisində saxlanılıb. Ondan külli miqdarda narkotik maddə-heroin aşkar edilib. Sirac Kərimov Cinayət Məcəlləsinin 234.4-cü maddəsi ilə ittiham edilib.
Onu da qeyd edək ki, Sirac Kərimovun qardaşı Müsavat Gənclər Təşkilatının üzvü Fərəc Kərimovda eyni maddə üzrə həbs edilərək, barəsində 3 aylıq həbs-qətiimkan tədbiri seçilib.