Sabah Nüsrət Kəsəmənlinin oğlunun məhkəməsidir - Açıqlama

Aprelin 29-da Ağır Cinayətlər Məhkəməsində mərhum şair Nüsrət Kəsəmənlinin oğlu Araz Kəsəmənlinin məhkəmə prosesi keçiriləcək.

Bu barədə Lent.az-a A.Kəsəmənlinin qardaşı Reşat Kəsəmənli məlumat verərək bildirib ki, məhkəmə iclası sabah saat 10:30-da başlayacaq: “Sabah Arazın məhkəməsidir. Bütün media nümayəndələrini, sabahkı məhkəməyə dəvət edirəm. Ümumiyyətlə, kim istəyirsə gəlib, məhkəmə prosesini canlı izləyə bilər. Gəlib görsünlər ki, mənim qardaşım günahsızdır. Mən Azərbaycan qanunlarına inanıram. Ümid edirəm ki, qardaşım azadlığa buraxılar. Hər şey sabah keçirilən məhkəmədən asılıdır. Buna görə də insanlar özləri qardaşımın məhkəmə prosesinə şahid olsunlar”.

Xatırladaq ki, Araz Kəsəmənlinin məhkəməsi aprelin 25-də keçirilməsi nəzərdə tutulsa da müəyyən səbəblərdən təxirə salınmışdı.

Qeyd edək ki, A.Kəsəmənli Cinayət Məcəlləsinin 234-cü (qanunsuz olaraq narkotik vasitə əldə etmə, saxlama, satma, daşıma, göndərmə) maddəsi ilə ittiham olunur. O, bir müddət əvvəl həbs edilib.