Baş polis idarəsi ağır qəzalarla bağlı məlumat yaydı

Bakı şəhər Baş Polis İdarəsi paytaxtda baş vermiş ağır yol qəzaları ilə bağlı məlumat yayıb. Lent.az-ın məlumatına görə, mayın 11-i saat 23:30 radələrində Səbail rayonu Səlyan yolu 32-də Bakı şəhər sakini 1964-cü il təvəllüdlü Sabir Hacıkərimov idarə etdiyi «Hyundai» markalı avtomobillə Neftçala rayon sakini 1979-cu il təvəllüdlü Xalid Cəbrayılovu, Səlyan rayon sakinləri 1978-ci il təvəllüdlü Zəfər Xəlilovu və 1979-cu il təvəllüdlü Misir Şirinovu vurub. Nəticədə, M.Şirinov xəstəxanaya aparılarkən yolda ölüb, X.Cəbrayılov və Z.Xəlilov xəsarətlə KTM-ya yerləşdirilib.

Bundan başqa mayın 11-i saat 22:30 radələrində Xətai rayonu Nobel prospektində Bakı şəhər sakinləri 1989-cu il təvəllüdlü Gündüz Balakişiyevin idarə etdiyi «Mercedes» markalı və 1970-ci il təvəllüdlü Bəxtiyar Həbibovun idarə etdiyi «VAZ-2106» markalı avtomobillər toqquşub. Nəticədə, «Mercedes» markalı avtomobilin sərnişini 1989-cu il təvəllüdlü Natiq Cəfərov Neyrocərrahiyə xəstəxanasına, B.Həbibov və sərnişinləri 1944-cü il təvəllüdlü Firəngiz Həbibova, 1961-ci il təvəllüdlü Təranə Həbibova 3 saylı ŞKX-na yerləşdirilib. F.Həbibova xəstəxanada ölüb.