Bakıda yanğın həyəcanı: 23 nəfər xilas edildi

Bu gün Bakı şəhərinin Səbail rayonunda beşmərtəbəli yaşayış binasında yanğın hadisəsi baş verib. Lent.az-ın Fövqəladə Hallar Nazirliyinin saytına istinadən verdiyi məlumata görə, mərtəbələrarası örtük, arakəsmə divarlar və dam örtüyü taxta konstruksiyalardan ibarət yaşayış binasının 2-ci mərtəbəsində vətəndaşa məxsus ümumi sahəsi 126 kv.m olan üçotaqlı mənzildə bacanın ətrafı (tavan) 15 kv.m sahədə, 3-cü mərtəbəsində digər vətəndaşa məxsus ümumi sahəsi 120 kv.m olan üçotaqlı mənzilin döşəməsi 8 kv.m və arakəsmə divarı 2 kv.m sahədə (ümumi 25 kv.m) yanıb. Yanğın zamanı 20 nəfər bina sakini, o cümlədən, yataq xəstəsi olan 1 nəfər yanğınsöndürənlər tərəfindən təxliyə olunub. Mənzillərin qalan hissəsi və bitişik mənzillər yanğından mühafizə olunub.

Oxşar hadisə Yasamal rayonunda məcburi köçkünlərin məskunlaşdığı, tikintisi başa çatmamış dördmərtəbəli binanın 1-ci mərtəbəsində də qeydə alınıb. Ümumi sahəsi 90 kv.m olan dördotaqlı mənzilin dəhlizində 1 ədəd divan yanıb. Mənzildə olan 3 nəfər yanğınsöndürənlər tərəfindən təxliyə olunub. Təxliyə olunanlardan biri tüstüdən zəhərləndiyi üçün Təcili Tibbi Yardım Xidməti tərəfindən xəstəxanaya aparılıb.