Bakıda müğənniyə qarşı cinayətin TƏFƏRRÜATI - YENİLƏNİB

Gənc müğənni Rövşən Civişov ona qarşı baş vermiş soyğunçuluq hadisəsi ilə bağlı açıqlama verib. Müğənni Lent.az-a bildirib ki, yanvarın 5-də şənliyə gedərkən 2 nəfər tanımadığı şəxs ona yaxınlaşıb, üstünə bıçaq çıxardaraq pul tələb edib: “Mən yerli telekanalların birinin çəkilişindən gəlirdim. Hadisə elə yerdə baş verdi ki, mən ora maşınla daxil ola bilməzdim. Maşını kənarda saxlayıb, dar küçə ilə piyada gedirdim. 2 nəfər tanımadığım şəxs yaxınlaşdı, üstümə bıçaq çəkdi, məndən pul tələb etdi. Mobil telefonumu, üstümdə olan saatımı, zinət əşyalarımı və 250 manat pulumu alıb qaçdılar. Belə hadisə hər kəsin başına gələ bilər. İndi onlar öz cəzalarını alacaqlar”.

***

17 yanvar saat 12:24

Bakıda törədilmiş soyğunçuluq hadisəsinin üstü açılıb. Bakı şəhər Baş Polis İdarəsindən Lent.az-a verilən məlumata görə, yanvarın 5-də, «26 Bakı komissarı» küçəsində, naməlum şəxs Bakı şəhər sakini Rövşən Civişovun 250 manatını və mobil telefonunu əlindən alaraq qaçıb. Sabunçu RPİ PPXB və 12-ci PB əməkdaşlarının keçirdikləri əməliyyat tədbirləri nəticəsində soyğunçuluqda şübhəli bilinən, Bakı şəhər sakini Samir Qasımov yanvarın 16-da yaxalanıb.

Lent.az-ın əldə etdiyi digər məlumata görə, R.Civişov müğənnidir. O, yanvarın 5-də evə gedərkən Sabunçu bazarının yaxınlığında soyğunçunun hücumuna məruz qalıb. S.Qasımov R.Civişova qarşı zorakılıq hərəkətləri edərək onun telefonunu və pulunu əlindən alıb.