Bakı yaxınlığında avtobus qəzası: ölən və yaralananlar var - YENİLƏNİB

Daxili İşlər Nazirliyi avqustun 28-də saat 00.45 radələrində Sumqayıt şəhəri ərazisində baş vermiş ağır qəza ilə bağlı məlumat yayıb. Lent.az-ın nazirliyin mətbuat xidmətinə istinadən verdiyi məlumata görə, şəhər sakini İbrahim Aslanov idarə etdiyi “Daewoo” markalı avtobusu yolun kənarındakı dəmir səddə vurduğundan, arxadan gələn həmyerlisi Natiq Qədəşovun idarə etdiyi “VAZ-2107” markalı avtomaşın ona çırpılıb. Nəticədə N.Qədəşovun sərnişinlərindən 40-45 yaşlı kişi xəstəxanaya aparılarkən yolda ölüb, xəsarət almış özü və digər 2 sərnişini isə xəstəxanaya yerləşdirilib.

Sumqayıt ŞPİ tərəfindən araşdırmalar aparılır.

*****

10.07

Avqustun 28-nə keçən gecə Abşeron rayonunda avtobusla minik avtomobili toqquşub. Lent.az-ın Fövqəladə Hallar Nazirliyinin saytına istinadən verdiyi məlumata görə, Sumqayıt Regional Mərkəzinə Abşeron rayonu, Ceyranbatan qəsəbəsində (Bakı-Sumqayıt yolunda) “VAZ 2107” və “Daewoo” markalı sərnişin avtobusunun toqquşması barədə məlumat daxil olub.

Nəticədə “VAZ 2107” markalı minik avtomobili deformasiyaya uğrayıb. Dərhal hadisə yerinə cəlb olunmuş xilasedicilər xüsusi alət və avadanlıqlar vasitəsilə deformasiyaya uğramış avtomobildə sıxılmış vəziyyətdə qalmış 1 nəfər sərnişini çıxararaq aidiyyəti üzrə təhvil verib. Hadisə şahidlərinin bildirdiklərinə əsasən, “VAZ 2107” markalı minik avtomobilinin sürücüsü vətəndaşlar tərəfindən çıxarılaraq hadisə yerinə çağırılmış Təcili Tibbi Yardım Stansiyasının əməkdaşları tərəfindən xəstəxanaya aparılıb.

Əməliyyat saat 01:32-də başa çatıb.