Azərbaycan diplomatının ölümünün səbəbləri araşdırılır
Azərbaycanın Almaniyadakı səfirliyinin əməkdaşı, ikinci katib Tural Qurbanovun ölüm səbəbləri araşdırılır. Xarici İşlər Nazirliyinin mətbuat xidmətinin katibi Elman Abdullayev Lent.az-a açıqlamasında diplomatın ölümünü təsdiq edib və araşdırmalar aparıldığını bildirib: “Tural Qurbanov məzuniyyətdə olub və Xarici İşlər Nazirliyinin əldə etdiyi məlumata görə, ürək çatışmazlığından rəhmətə gedib”.
Qeyd edək ki, 29 yaşlı diplomatın meyiti iyulun 25-də səhər saatlarında Maldiv adalarında, paytaxtın yaxınlığındakı “Kurumba Resort” otelində tapılıb. Ölümün səbəbləri hələlik dəqiq məlum deyil. Azərbaycanın Maldiv adalarında səfirliyi olmadığından, həmin ölkədən məlumatlar İndoneziyadakı səfirliyimiz vasitəsi ilə əldə edilir.