"Ruslanın məzarı başında Ukrayna və Azərbaycan bayraqları dalğalanır"

Avqustun 23-ü Ukraynanın Xarkov şəhərində 22 il əvvəl Qarabağda şəhid olmuş Ruslan Polovinkanın ailəsinə Milli qəhrəmanın “Qızıl ulduz”u təqdim olunub. Lent.az-ın xəbərinə görə, R.Polovinkanın anası Qalina Polovinka “Qızıl ulduz”un onlara gəlib çatmasında göstərdikləri xidmətlərə görə, Vesti.az saytının baş direktorunun birinci müavini Zaur Nurməmmədov və onun dostu Rəhman Əliyevə təşəkkürünü bildirib. Q.Polovinka bildirib ki, məhz bu şəxslərin sayəsində oğlunun ölümündən 22 sonra “Qızıl ulduz” onlara təqdim olunub: “Bu uşaqlar sağ olsun. Biz onların köməkliyi ilə oğlumuza verilmiş “Qızıl ulduz”u aldıq. Bir daha sağ olsunlar”.

Milli qəhrəmanın “Qızıl ulduz”unu R.Polovinkanın ailəsinə polkovnik Abdulla Qurbani təqdim edib.

R.Polovinka 1992-ci il avqustun 6-də ermənilərlə döyüşdə şəhid olub. Vesti.az saytınının baş direktorunun birinci müavini Zaur Nurməmmədov Zmiev şəhərində unudulmuş qəhrəmanın ailəsi ilə görüşəndən sonra müdafiə naziri general-polkovnik Zakir Həsənovun əmri ilə polkovnik Abdulla Qurbani Xarkov şəhərinə yollanıb. Azərbaycanın Milli Qəhrəmanı fəxri adına layiq görülmüş Ruslan Aleksandroviç Polovinkanın ailəsinə baş çəkib, qəhrəmanın xatirəsinə həsr olunmuş anım mərasimlərində iştirak edib.