Qaydaları pozan azərbaycanlı ölkədən qovulur

Rusiyanın Kursk vilayətində 31 yaşlı Azərbaycan Respublikası vətəndaşı məhkəmə qarşısına çıxıb. Həmin şəxs Rusiyada qalma qaydalarını pozub.

Lent.az yerli KİV-ə istinadla bildirir ki, 2021-ci ilin dekabrında kişi Moskvada yaşamaq icazəsi alıb. 2023-cü ilin oktyabrına qədər o, paytaxtda yaşayıb, sonra isə Tula vilayətinə köçüb.

Eyni zamanda, həmin şəxsə əvvəllər Rusiyaya giriş qadağan edilib. Bu, onun Rusiya Federasiyasının yol hərəkəti təhlükəsizliyinin təmin edilməsi sahəsində qanunvericiliyin tələblərini pozduğuna görə üç dəfə inzibati məsuliyyətə cəlb edilməsi ilə bağlı olub.

Məhkəmə qərarı ilə azərbaycanlının yaşayış icazəsi ləğv edilib. Kişidən 2023-cü il fevralın 11-dək ölkəni tərk etməsi tələb olunub. Lakin o, bunu etməyib.

Daha sonra o, Kursk vilayətində saxlanılıb. Məhkəmə azərbaycanlını 2 min rubl (təxminən 37 manat) cərimələyib. Bundan əlavə, kişi Rusiya Federasiyasının ərazisindən çıxarılacaq.