Maşınlardan qiymətli əşyaları oğurlayan saxlanıldı

Bakı ərazisində avtomobillərin şüşələrini sındıraraq nəqliyyat vasitələrinin salonlarından telefon, noutbuk, pul kisələləri və digər qiymətli əşyalar oğurlayan şəxs saxlanılıb.

Daxili İşlər Nazirliyinin mətbuat xidmətindən Lent.az-a verilən məlumata görə, Nərimanov rayon Polis İdarəsi 18-ci Polis Şöbəsinin əməkdaşlarının keçirdiyi əməliyyat nəticəsində hadisələri törətməkdə şübhəli bilinən Gəncə şəhər sakini İlqar Məmmədov tutulub.

Araşdırmalar zamanı onun Nərimanov rayonu ilə yanaşı, Yasamal və Nəsimi rayonlarında da 10-a yaxın avtomobilin şüşəsini sındırdığı müəyyən edilib. Bu şəxsin törətdiyi qanunsuz əməllərin bir neçəsi müşahidə kameraları vasitəsilə də görüntülənib.

İlqar Məmmədov barəsində 18-ci Polis Şöbəsində araşdırmalar davam etdirilir.