Bakıda 3 avtobus TOQQUŞDU - YENİLƏNİB - VİDEO

"Bakıda 3 marşrut avtobusunun iştirakı ilə baş verən qəza zamanı avtobuslarda sərnişin olmayıb".

Bu barədə Lent.az-a Bakı Nəqliyyat Agentliyindən bildirilib. Qeyd olunub ki, yanvarın 6-da Suraxanı qəsəbəsi Zığ şosesində 104, 113 və 217 nömrəli müntəzəm marşrut xətləri üzrə avtobusların iştirakı ilə yol nəqliyyat hadisəsi baş verib:

"Hadisə nəzarətə götürülərək müvafiq araşdırma aparılıb. Marşrut xətləri üzrə sərnişindaşıma fəaliyyəti göstərən "BUS TRANS" MMC", "Transkontrol" MMC və "Azlənd Plaza" MMC-nin məsul şəxsləri Bakı Nəqliyyat Agentliyinə çağırılaraq izahatları alınıb.

Məlumat üçün bildiririk ki, hadisə nəqliyyat vasitələrinin reysə başlanma vaxtından əvvəl qeyd alındığından avtobuslarda sərnişin olmayıb. "Azlənd Plaza" MMC müvəqqəti istismarında olan 217 nömrəli marşrutun sürücüsü xəsarət alıb".

***
Saat: 10:28

Bakıda yol-nəqliyyat hadisəsi olub.

Fövqəladə Hallar Nazirliyindən Lent.az-a verilən məlumata görə, hadisə bu gün səhər saat 6 radələrində paytaxtın Suraxanı rayonu ərazisində Suraxanı dairəsində baş verib. Məlumata əsasən, qəza bir neçə avtomobilin iştirakı ilə qeydə alınıb. Qəzanəticəsində vətəndaş avtomobildə sıxılı vəziyyətdə qalıb. Dərhal əraziyə FHN-in Xüsusi Riskli Xilasetmə Xidmətinin müvafiq xilasetmə qüvvələri cəlb olunub.

Hadisə yerində əməliyyat şəraiti qiymətləndirilərkən 3 avtobusun iştirakı ilə yol-nəqliyyat qəzasının baş verdiyi, hadisə nəticəsində 32 yaşlı Məmmədov Rəvan Fazil oğlunun idarə etdiyi “Daewoo” markalı avtobusda sıxılı vəziyyətdə qaldığı müəyyən olunub.

Xilasedicilər xüsusi xilasetmə alət və avadanlıqları vasitəsilə sıxılı vəziyyətdə qalmış avtobus sürücüsünü xilas edərək təcili tibbi yardım briqadasına təhvil veriblər.