Astarada təkəri partlayan mikroavtobus aşdı, 16 nəfər yaralandı - YENİLƏNİB

Astarada mikroavtobusun aşması nəticəsində Lənkəran Rayon Mərkəzi Xəstəxanasına 4 nəfər daxil olub.

Lent.az APA-ya istinadla xəbər verir ki, xəsarət alanlar - Astara rayonunun Kijəbə qəsəbə sakini, 34 yaşlı Tosif Nəcibulla oğlu Salayev, Astara rayon sakini, 49 yaşlı Elşən Qəyanəli oğlu Həkimov, Astara rayonunun Ağ Körpü kənd sakini, 41 yaşlı Hicran Qədəməd oğlu Abdullayev və Astara rayonunun Pəlikeş kənd sakini Əsmət Hacırza qızı İbayevadır.

Hazırda onların müalicələri xəstəxananın müvafiq şöbələrində davam etdirilir.

***

Bu gün, saat 09:45-də Astara rayonunun Deqədi kəndi ərazisində mikroavtobusun aşması ilə nəticələnən yol-nəqliyyat hadisəsi qeydə alınıb.

Baş Dövlət Yol Polisi İdarəsindən Lent.az-a bildirilib ki, Telman Xudaquliyevin idarə etdiyi “Mercedes” markalı mikroavtobus Deqədi-Kijəbə-Astara marşrutu üzrə hərəkətdə olarkən, təkərin partlaması nəticəsində idarəetmədən çıxaraq yol kənarına aşıb.

Qəza nəticəsində mikroavtobusda olan 14 sərnişindən 2-si – Əsmət İbayeva və Elşən Həkimov müxtəlif dərəcəli bədən xəsarətləri alaraq, xəstəxanaya yerləşdiriliblər.

Hadisə yerinə DYP əməkdaşları cəlb olunub, faktla bağlı araşdırma aparılır.

Baş Dövlət Yol Polisi İdarəsi qeyd olunan səbəblərdən dəfələrlə ağır-yol nəqliyyat hadisələrinin baş verdiyini nəzərə alaraq, bir daha sürücüləri, xüsusilə sərnişin və yükdaşıma fəaliyyəti göstərən hüquqi və fiziki şəxsləri nəqliyyat vasitələrinin texniki sazlığına vaxtaşırı nəzarət etməyə, reysqabağı texniki müayinədən keçməyə, nasaz, texniki-təhlükəsizlik baxımından normativ tələblərə cavab verməyən avtomobillə yola çıxmaqdan çəkinməyə çağırır.

***
14:08

Astarada yol qəzasında 16 nəfər xəsarət alıb.

APA-nın cənub bürosunun xəbərinə görə, onlardan 4 nəfər Lənkəran Rayon Mərkəzi Xəstəxanasının Təcili yardım şöbəsinə hospitalizasiya olunub.

Astara Rayon Mərkəzi Xəstəxanasına çatdırılan 12 nəfərə isə tibbi yardım göstəriləndən sonra ambulator müalicə üçün evə buraxılıblar.

***

12:39

Astarada idarəetməni itirən mikroavtobus aşıb.

Lent.az APA-ya istinadla xəbər verir ki, hadisə Kijəbə-Deqədi kənd yolunda baş verib.

Astara istiqamətində hərəkətdə olan "QazEl" markalı mikroavtobus Deqədi kəndi ərazisində aşıb. Qəza nəticəsində 10-dan çox sərnişin xəsarət alıb. Xəsarət alanlar Astara və Lənkəran rayon mərkəzi xəstəxanalarına hospitalizasiya olunublar.

Marşrutda 20-ə yaxın sərnişin olduğu bildirilir.

Faktla bağlı araşdırma aparılır.