40-a yaxın evdən oğurluq edən tutuldu

Şamaxı rayonunda yerləşən evlərdən yanvar-fevral aylarında silsilə oğurluqlar edilməsi barədə rayon polis şöbəsinə məlumat daxil olub. 4 evə daxil olan naməlum şəxs ümumi dəyəri 1600 manatdan artıq olan-mobil telefonlar, fotoaparat, planşet, televizor avadanlıqları və digər əşyaları oğurlayıb.

Daxili İşlər Nazirliyi mətbuat xidmətinin Şəki regional qrupundan Lent.az-a verilən məlumata görə, polis əməkdaşları hadisə yerlərinə baxış keçirib və iş üçün əhəmiyyət kəsb edən maddi sübutlar götürülüb.

Əməliyyat-axtarış tədbirləri nəticəsində cinayət əməlini törətməkdə şübhəli bilinən rayon sakini Zamir İmanov elə “iş başında” yaxalanıb.

Sonuncu dəfə rayon ərazisində yerləşən evlərin birindən oğurluq etmək istəyən həmin şəxs tutularaq istintaqa təhvil verilib. O, ifadəsində rayon ərazisindəki yaşayış olmayan daha 40-a yaxın mənzildən oğurluq etdiyini və əldə etdiklərini yaşadığı evin həyətyanı sahəsindəki tövlədə gizlətdiyini bildirib.

Faktla bağlı Şamaxı rayon Polis Şöbəsində cinayət işi başlanılıb. Saxlanılan şəxsin digər analoji cinayətlərdə də iştirakı istisna edilmədiyindən onun ətrafında əməliyyat-istintaq tədbirləri davam etdirilir.