İsmayıllıda yanğının qarşısı alınıb

APA-nın məlumatına görə bu gün səhər saat 9:00 radələrində İsmayıllı rayonunun Bakı-Şamaxı-Yevlax avtomobil yolunun kənarında yerləşən Gəraybəyli və Eyyubbəyli kəndlərinin dağlıq ərazisində, Girdiman çayının sahili boyunca uzanan kiçik ağac və kolluqlardan ibarət yaşıllıq sahəsində yanğın hadisəsi baş verib.

Alov getdikcə daha geniş ərazini əhatə edib. Yanğının söndürülməsi üçün əraziyə İsmayıllı, Ağsu, Göyçay və Kürdəmir yanğından mühafizə hissələrinin maşınları və canlı qüvvəsi, eləcə də Şamaxıda yerləşən mülki müdafiə qoşunlarının əsgərləri və 3 helikopteri cəlb edilib. Ərazi dağlıq ərazi olduğu üçün alovun qarşısının alınmasında əl əməyindən istifadə edilməsi çətinləşib. Saat 18.00 radələrində yanğının qarşısı alınıb.

Alov tam söndürülməsə də, yanğının yayılma təhlükəsi yoxdur. Hazırda yanğın ocaqları söndürülür, əraziyə nəzarət edilir. Ümumilikdə 6 hektara yaxın ərazinin yandığı bildirilir.

Yanğının hansı səbəbdən baş verməsi hələ ki, məlum deyil. Fövqəladə Hallar Nazirliyinin Şimal-Qərb Regional Mərkəzinin və Dövlət Yanğından Mühafizə Xidmətinin rəhbər şəxsləri hadisə yerindədir.