Əfqanıstanda qəzaya uğrayan təyyarənin şəkli çəkilib

Hazırda Azərbaycan tərəfinin əsas məqsədi qəzaya uğrayan təyyarənin yanına yaxınlaşmaq, onun qara qutusunu götürmək və həlak olanların nəşlərini ölkəyə gətirməkdir.

Lent.az-ın verdiyi məlumata görə, bunu AZAL-ın vitse-prezidenti İlham Əmirov söyləyib.
İlham Əmirov deyib ki, təyyarənin qəzaya uğradığını ehtimal edirlər: “Ancaq başqa ehtimal da təyyarənin “Taliban” tərəfindən vurulmasıdır”.

İlham Əmirov bildirib ki, təyyarənin yanına ilk uçuş zamanı heç bir müvəffəqiyyət əldə olunmayıb. Lakin ikinci uçuşda şəkillər çəkilib. İkinci uçuş zamanı çəkilən şəkillərdən isə məlum olur ki, bu, həqiqətən “Silk Way Holdinq” MMC-nin təyyarəsidir.

Onun sözlərinə görə, təyyarə 3 min 800 metr yüksəklikdə Əfqanıstandakı radarlardan itib. Daha sonra qəzanın araşdırılması ilə bağlı komissiya yaradılıb. Hazırda komissiya üzvlərinin 5 nəfəri Əfqanıstandadır. 1 nəfər Əfqanıstan Nəqliyyat Nazirliyi və NATO qüvvələri ilə birlikdə qəzaya uğrayan təyyarəyə yaxınlaşmağa çalışıblar, ancaq bu, mümkün olmayıb.

AZAL-ın vitse-prezidenti nəzərə çatdırıb ki, qəzaya uğrayan təyyarənin təhqiqat işlərini Əfqanıstan Nəqliyyat Nazirliyi öz üzərinə götürüb: “Beynəlxalq konvensiyalara əsasən, bu məsuliyyəti Əfqanıstan Hava Yolları da, Əfqanıstan Nəqliyyat Nazirliyi də öz üzərinə götürə bilərdi. Onların bu təhqiqatı aparmaq imkanları olmadığı halda Azərbaycan bu təhqiqat işini apara bilərdi. Lakin Əfqanıstan Nəqliyyat Nazirliyi bu işlə məşğul olmaq istədiyini bildirdi. Biz də etiraz etmədik. Əfqanıstan Nəqliyyat Nazirliyi tərəfindən yaradılan təhqiqat qrupunda Azərbaycanda yaradılmış komissiyanın 1 üzvü təmsil olunacaq”.

Anar Gəraylı