“VAZ” və “Prado” körpüdən aşaraq çaya düşüb

İki minik avtomobili körpüdən aşaraq çaya düşüb. Lent.az-ın Fövqəladə Hallar Nazirliyinin rəsmi saytına istinadən verdiyi məlumata görə, bu gecə Lənkəran rayonu, Vervul kəndində (rayon mərkəzindən 16 km aralı) vətəndaşa məxsus “VAZ” markalı minik avtomobili sürücünün idarəetməsindən çıxaraq körpüdən Veravul çayına düşüb.

Nəqliyyat vasitəsi deformasiyaya uğrayıb, avtomobilin sürücüsü xəsarət alıb. Xilasedicilər xüsusi alət və avadanlıqlar vasitəsilə yaralını deformasiyaya uğramış avtomobildən çıxararaq aidiyyəti üzrə təhvil verib, ərazidə müvafiq təhlükəsizlik tədbirləri görüblər. Əməliyyat saat 00:24-də başa çatıb.

Bu gün səhər saatlarında isə Qaraçay çayının Quba rayonu ərazisindən keçən hissəsində "Prado" markalı minik avtomobili sürücünün idarəetməsindən çıxaraq Qaraçay körpüsündən aşmışdır. Nəqliyyat vasitəsi deformasiyaya uğrayıb, avtomobilin sürücüsü və 2 sərnişin xəsarət alıb. Xilasedicilər xüsusi alət və avadanlıqlar vasitəsilə yaralıları deformasiyaya uğramış avtomobildən çıxararaq ilkin tibbi yardım göstərib və aidiyyəti üzrə təhvil veriblər. Əməliyyat saat 06:20-də başa çatıb.