Avtomobil qəzasında 2 körpə ölüb

APA-nın şimal bürosunun məlumatına görə, Bakı şəhər sakini Anar Həsənovun idarə etdiyi 90 GD 240 dövlət nömrə nişanlı, “Hyundai Sonata” markalı avtomobil Bakı istiqamətində hərəkət edərkən Quba-Bakı yolunun 4-cü km-də, Quba rayonunun Nərimanovka kəndi ərazisində yoldan çıxaraq öncə elektrik dirəyinə, daha sonra isə hasara çırpılıb. Nəticədə avtomobildə olan sərnişinlər - Bakı şəhər sakinləri, 1987-ci il təvəllüdlü Həsənova Bəsti Vilayət qızı, iki yaşlı Hüseynov Tariyel Sabir oğlu və beş aylıq körpə Həsənov Xanbaba Anar oğlu hadisə yerindəcə ölüb. Avtomobildə olan digər sərnişinlər Bakı şəhər sakinləri 1982-ci il təvəllüdlü Həsənova Günay Vilayət qızı və 2003-cü il təvəllüdlü Həsənov Ağayar Anar oğlu isə ağır vəziyyətdə Quba Mərkəzi Rayon Xəstəxanasına yerləşdirilib. Xəstəxananın cərrahiyyə şöbəsinin müdiri Gəray Qurbanov APA-nın yerli müxbirinə bildirib ki, xəstələrə ilkin tibbi yardım göstərilib. Günay Həsənovanın vəziyyəti digər xəstəyə nisbətən daha ağırdır.

Hadisə şahidlərinin sözlərinə görə, qəzaya yüksək sürət səbəb olub. Faktla bağlı araşdırma aparılır.