Bakı Metropolitenində nəzarət gücləndirilib

Bakı Metropolitenində nəzarət gücləndirilib. Lent.az-ın məlumatına görə, artıq iki gündür ki, metro stansiyalarında nəzarət tədbirləri, sərnişinlərin yük və çantalarının yoxlanması daha da ciddiləşib. Müşahidə zamanı metro stansiyalarının daxilində də əvvəlkindən daha çox polis əməkdaşının xidmət apardığı görünür.

Daxili İşlər Nazirliyinin mətbuat xidmətinin şöbə rəisi Orxan Mansurzadə bu faktı Lent.az-a təsdiqləyib. Onun sözlərinə görə, metro stansiyalarında mühafizə daha da gücləndirilib: “Nəzarət tədbirləri və tələbkarlıq əvvəlkinə nisbətən artırılıb”.

O.Mansurzadə həmçinin qeyd edib ki, polis Metropolitendə həmişə gücləndirilmiş iş rejimi formasında işləyib: "Strateji obyekt kimi metroda polis həmişə gücləndirilmiş iş rejimində işləyib. Bu günlərdə isə şəxsi heyətin ayıq-sayıqlığı daha da artırılıb".

Qeyd edək ki, son günlər ABŞ, Böyük Britaniya və İsrail Azərbaycanda terror təhlükəsinin gözlənilməsi ilə bağlı öz vətəndaşlarına xəbərdarlıq edib.

Nizam Rza