4 aylıq körpəsinin başını kəsən ata məcburi müalicəyə göndərildi

Zaqatala sakini 1 saylı Maştağa Ruhi-Əsəb Dispanserində müalicə olunacaq
Oktyabrın 14-də Ağır Cinayətlərə Dair İşlər üzrə Məhkəmədə 4 aylıq övladının başını kəsməkdə ittiham olunan Zaqatala rayon Axaxdərə kənd sakini, 24 yaşlı Cəfər Zigilovun məhkəmə prosesi yekunlaşıb.

Lent.az-ın,məlumatına görə, məhkəmə C. Zigilovun hadisəni anlaqsız vəziyyətdə törətməsini nəzərə alaraq, onun barəsində məcburi müalicə təyin edib.

Məhkəmənin qərarı ilə C.Zigilov 1 saylı Maştağa Ruhi-Əsəb Dispanserinə göndərilib.
Qeyd edək ki, C. Zigilov Azərbaycan Respublikası Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) və 120.2.9-cu ( təqsirkar şəxs üçün aşkar surətdə köməksiz vəziyyətdə olan adamı öldürmə) maddələri ilə ittiham olunub.
2008-ci il iyunun 26-da C.Zigilovun həyat yoldaşı Gülpəri İsmayılova ilə aralarında qısqanclıq zəminində münaqişə yaranıb. Bundan sonra C.Zigilov digər otağa keçib, mətbəx bıçağı ilə 4 aylıq qızı Arzu Zigilovanın başını kəsərək qətlə yetirib.
Fərid Əkbərov