Orduda “donuz qripi” təhlükəsi ilə bağlı nəzarət gücləndirilib

Azərbaycan Ordusunda A/H1N1 (“donuz qripi”) virusuna yoluxma təhlükəsini önləmək məqsədilə müxtəlif qoşun birləşmələrində müvafiq tədbirlərin həyata keçirilməsinə başlanıb.

Müdafiə Nazirliyinin mətbuat xidmətindən APA-ya bildirilib ki, hərbçilərin təhlükəli virusa yoluxmaması üçün hərbi hissələrdə həkim nəzarəti həyata keçirilir. Həmçinin əsgərlərin gündəlik gigiyenik normalara riayət etmələrinə, qidalanmalarına nəzarət edilir.

Dövlət Sərhəd Xidmətindən APA-ya bildirilib ki, A/H1N1 təhlükəsi ehtimalı nəzərə alınaraq, bir neçə ay əvvəlcədən Sərhəd Qoşunlarının hərbi hissələrində qabaqlayıcı tədbirlər həyata keçirilib. Bütün hərbi hissələr, sərhəd zastavaları dərman preparatları ilə təchiz olunub, əsgərlərin bu virusa yoluxmamaları üçün lazımi tədbirlərin görülməsi barədə tapşırıqlar verilib. Komandir heyətinə əsgərlərin gigiyenik normalara riayət etmələrinə nəzarəti gücləndirmək tapşırılıb.

Daxili Qoşunlardan da APA-ya xəstəliyin yayılmaması üçün qabaqlayıcı sanitar-gigiyenik tədbirlərin görüldüyü bildirilib.