Dəhşətli qəzada ölən 7 nəfərin kimliyi müəyyənləşdi

Bakı-Şamaxı avtomobil yolunda baş vermiş dəhşətli yol-nəqliyyat hadisəsi nəticəsində ölənlərin adı məlum olub. Baş Dövlət Yol Polisi İdarəsinin (BDYPİ) istintaq və təhqiqat şöbəsinin müstəntiqi Rafiq Həsənov APA-nın Şirvan bürosuna bildirib ki, hadisə bu gün səhər saat 10:00 radələrində magistral yolun 94-cü kilometrliyində, Qobustan rayonu ərazisində qeydə alınıb.

Şamaxı rayon sakini, 1965-ci il təvəllüdlü Kərimov Rauf Əsgər oğlunun idarə etdiyi, Azərbaycan Beynəlxalq Bankının Şamaxı filialına məxsus, 10 AB 645 dövlət nömrə nişanlı, “QAZ 3110” markalı minik avtomobili qarşı tərəfdən gələn, Sumqayıt şəhər sakini, 1969-cu il təvəllüdlü Valehov Xanlar Tacəddin oğlunun idarə etdiyi, 50 CC 687 dövlət nömrə nişanlı, “Daewo Nexia” markalı minik avtomobili ilə toqquşub.

Hadisə nəticəsində 7 nəfər dünyasını dəyişib, bir nəfər ağır bədən xəsarəti alıb. Hadisə nəticəsində ölən şəxslərin kimliyi artıq müəyyənləşib. Bunlar “QAZ 3110”-un sərnişini, Şamaxı rayon sakini, 1969-cu il təvəllüdlü İmanov Hafiz Əlihüseyn oğlu, “Daewo Nexia” markalı avtomobilin sürücüsü, Sumqayıt şəhər sakini, 1969-cu il təvəllüdlü Valehov Xanlar Tacəddin oğlu və sərnişinləri - Oğuz rayon sakinləri, 1978-ci il təvəllüdlü Kərimov Yalçın Hilal oğlu, 1978-ci il təvəllüdlü Ramazanov Dəyanət Şaban oğlu, onun həyat yoldaşı, 1980-ci il təvəllüdlü Ramazanova Rəşidə Cahan qızı, onların 4 yaşlı övladları Ramazanov Cəsarət Dəyanət oğlu və qayını, 1985-ci il təvəllüdlü İsmayılov Rəşid Cahan oğludur.

“QAZ 3110”un sürücüsü R. Kərimov isə koma vəziyyətində Bakıya xəstəxanaya aparılıb.

Faktla bağlı BDYPİ-nin istintaq və təhqiqat şöbəsində cinayət işi açılıb, araşdırma aparılır.