“Ermənistanın qanunları pozması zəiflik əlamətidir”

“Azərbaycanın ərazi bütövlüyü beynəlxalq təşkilatlar tərəfindən tanınıb. Buna əməl olunmalıdır”.

APA-nın xəbərinə görə, bunu jurnalistlərə açıqlamasında Milli Məclisin Beynəlxalq münasibətlər komitəsinin sədri Səməd Seyidov deyib. Komitə sədri bildirib ki, Ermənistanın beynəlxalq hüquq normalarına əməl etməməsinə Azərbaycan ciddi reaksiya verməlidir və verib: “Biz bütün dünyaya bir daha sübut etmək istəyirik ki, Azərbaycanın ərazi bütövlüyünün pozulmasına imkan verməyəcəyik. Ermənistanın dünyada qəbul olunmuş qayda-qanunları daim pozması güc deyil, əksinə zəiflik əlamətidir. Azərbaycan heç vaxt beynəlxalq hüquq normalarını pozmayıb və pozmaq fikrində deyil. Ancaq bəzən biz eşidir və görürük ki, Ermənistanın beynəlxalq təşkilatlarda mövqeyi aqressivləşir, danışıqlar zamanı kəskin mövqe tuturlar”.

S. Seyidov qeyd edib ki, bu, Azərbaycanın beynəlxalq ictimaiyyətdə mövqeyinin güclü olduğunu göstərir: “Ermənistan başa düşür ki, sözlə, məntiqlə, qanunla, beynəlxalq davranışla fəaliyyətini qura bilmir, ona görə də bu çərçivədən kənar fəaliyyət göstərməyə başlayır”.