Məşum qəza: 5 zəvvarımız öldü, 27-si yaralandı

Qafqaz Müsəlmanları İdarəsi (QMİ) Türkiyənin Sivas şəhəri yaxınlığında qəzaya uğrayan avtobusun sərnişinlərinin azərbaycanlı zəvvarlar olduğunu bildirib.

APA-nın verdiyi xəbərə görə, QMİ-nin mətbuat xidmətinin rəhbəri Rəhimə Dadaşova jurnalistlərə bildirib ki, əldə olan məlumata görə, qəzada üç nəfər ölüb, lakin o istisna etməyib ki ölənlərin sayı daha da çox ola bilər.

QMRİ Azərbaycanın Türkiyədəki Səfirliyi ilə əlaqə saxlayır. Sabah qəzanın baş verdiyi Sivas şəhərinə QMİ-nin nümayəndəsi gedəcək.

Dadaşovanın sözlərinə görə, qəzada həlak olanların Azərbaycana təyyarə ilə gətirilməsi təmin olunacaq.

Azərbaycanın Türkiyədəki səfirliyinin son məlumatına görə, Sivasda qəzaya uğrayan avtobusda 5 nəfər ölüb, 27 nəfər yaralanıb.

Səfirliyin mətbuat xidmətinin rəhbəri Elsəvər Salmanov APA-ya bildirib ki, yaralılardan 7-nin vəziyyəti ağırdır.

Səfirliyin konsulu Şöhrət Mustafayev hadisə baş verdiy Sivas şəhərinə ezam olunub. Azərbaycanın diplomatik missiyası Türkiyə polisi və Sivas xəstəxanaları ilə əlaqə saxlayır.