Aqrolizinq” MMC-nin filial rəhbərinə 10 il həbs cəzası istənildi

Avqustun 19-da mənimsəmə və israfda təqsirləndirilən “Aqrolizinq” MMC-nin filial rəhbərinin cinayət işi üzrə məhkəmə prosesi keçirilib.

Lent.az-ın məlumatına görə, hakim Cavid Hüseynovun sədrliyi ilə keçirilən prosesdə dövlət ittihamçısı “Aqrolizinq” MMC-nin Bərdə rayon filialının rəhbəri Vüqar Zeynalova cəza istəyib. Prokuror V.Zeynalovun 10 il müddətinə azadlıqdan məhrum edilməsini məhkəmədən xahiş edib.

Proses müdafiə tərəfinin çıxışı ilə davam etdiriləcək.

İttihama görə, V.Zeynalov rəhbərlik etdiyi Aqrolizinq MMC-nin Bərdə rayon filialının rəhbəri vəzifəsində işləyərkən dövlət büdcəsindən rayonun kənd təsərrüfatının inkişafına ayrılmış 160 min manatı mənimsəyib.

O, Baş Prokurorluğunun Korrupsiyaya Qarşı Mübarizə İdarəsinin əməkdaşları tərəfindən tutulub.

Qeyd edək ki, V. Zeynalov Azərbaycan Respublikası Cinayət Məcəlləsinin 179-cü (mənimsəmə və ya israf etmə) və 308.1-ci (vəzifə səlahiyyətlərindən sui-istifadə etmə) maddəsi ilə ittiham olunur.

Fərid Əkbərov