Yasamalda törədilən güllələnmə hadisəsinin təfərrüatları məlum oldu

Bakı şəhəri, Yasamal rayonunda qadının güllələnməsi hadisəsinin təfərrüatları məlum olub.

Lent.az-ın Baş Prokurorluğun rəsmi saytına istinadən verdiyi xəbərə görə, Hacıqulu Səlimov qonşusu Eyyub Mustafayevlə dalaşıb, açılmış atəş nəticəsində güllələrdən biri təsadüfən qonşusunun həyat yoldaşına dəyib.

Yayılan məlumatda göstərilir kİ, avqustun 1-də saat 09:30-da Bakı şəhəri, Yasamal rayon sakini, əvvəllər məhkum olunmuş, 1957-ci il təvəllüdlü Səlimov Hacıqulu Hacıağa oğlu yaşadığı evin həyətində qonşusu, əvvəllər məhkum olunmuş, 1948-ci il təvəllüdlü Mustafayev Eyyub Ağa oğlu ilə şəxsi münasibətlər zəminində aralarında baş vermiş münaqişə zamanı istintaqa məlum olmayan mənbədən əldə etdiyi “Makarov” tipli tapançadan sonuncuya 3-4 atəş açmış və güllələrdən biri E.Mustafayevin arvadı Mustafayeva Xalidə İbrahim qızının qoluna dəyib.

H.Səlimov cinayət əməlini törətdikdən sonra hadisə yerindən qaçıb, X.Mustafayeva isə aldığı güllə yarası ilə xəstəxanaya yerləşdirilib.

Faktla bağlı Azərbaycan Respublikası Cinayət Məcəlləsinin 29, 120.2.2, 29, 120.2.4 və 228.1-ci maddələri ilə cinayət işi başlanıb, iş üzrə müvafiq ekspertizalar təyin olunub.

Rayon prokurorluğu və rayon Polis İdarəsinin əməkdaşları tərəfindən həyata keçirilmiş təxirəsalınmaz istintaq-əməliyyat tədbirləri nəticəsində cinayətin törədilməsində şübhəli bilinən H. Səlimov həmin gün saat 18:30-da tutulub və onun üstündən cinayətin törədilməsində istifadə etdiyi tapança və bir ədəd patron aşkar edilərək götürülüb. H.Səlimov şübhəli şəxs qismində dindirilərkən törətdiyi cinayət əməlini etiraf edib. Hazırda iş üzrə istintaq rayon prokurorluğunda davam etdirilir.

Vüqar Baba