“Azərenerji”nin avtomobili mikroavtobusla toqquşdu, 10 yaralı

Mingəçevir şəhərində ağır avtomobil qəzası baş verib.

Şəhər Polis Şöbəsindən APA-nın yerli bürosuna verilən məlumata görə, hadisə aprelin 27-də saat 14:30 radələrində N. Nərimanov və 20 Yanvar küçələrinin kəsişməsində qeydə alınıb.

1973-cü il təvəllüdlü Tağıyev Xaspolad Varaşin oğlunun idarə etdiyi 45-AA-145 dövlət nömrə nişanlı “Nissan X-Trail” markalı minki avtomobili 1968-ci il təvəllüdlü Məmmədov Şəmsəddin Qəhrəman oğlunun idarə etdiyi 10-KL-538 dövlət nömrə nişanlı “Mercedes-Benz” markalı sərnişin mikroavtobusu ilə toqquşub.

Hadisə nəticəsində “Azərenerji” ASC-nin Mingəçevir Regional Elektrik Təchizatı İdarəsinə məxsus olan xidməti avtomobilin sürücüsü və Nəqliyyat Departamentinin 15 saylı “Mingəçevir Regional Nəqliyyat” MMC-yə məxsus 7 saylı marşrut üzrə hərəkət edən mikroavtobusun 9 sərnişini müxtəlif bədən xəsarətləri ilə Mingəçevir Mərkəzi Şəhər Xəstəxanasına yerləşdirilib. Xəsarət alan 1964-cü il təvəllüdlü Allahverdiyeva Bəsti Əvəz qızının və 1967-ci il təvəllüdlü Əhmədova Məleykə İbrahim qızının vəziyyəti daha ağır olduğu üçün reanimasiya şöbəsinə yerləşdiriliblər.

Faktla bağlı Mingəçevir şəhər Polis Şöbəsində cinayət işi açılıb, araşdırma aparılır.