Uçan bina ARDNŞ-in balansında olub

Sakinlər müvəqqəti kirayə mənzillərlə təmin ediləcəklər

Bakının Binəqədi rayonunun Rəsulzadə qəsəbəsi, Əli Məmmədov küçəsi, ev 10/11-də yerləşən və bu gün ikinci mərtəbəsinin divarı uçan ikimərtəbəli yaşayış binası ARDNŞ-in balansındadır.

Lent.az-ın müxbirinin verdiyi məlumata görə, bunu fövqəladə hallar nazirinin müavini Orucəli Hacıyev söyləyib.

Orucəli Hacıyev bildirib ki, 12 mənzildən ibarət bu binada 12 ailə yaşayıb. Onun sözlərinə görə, Fövqəladə Hallar Nazirliyinə məlumat daxil olan kimi dərhal nazirliyin xilasediciləri hadisə yerinə gəliblər: “Mənzildə yaşayan 12 ailə evakuasiya olunub. ARDNŞ bina sakinlərini müvəqqəti yaşamaq üçün kirayə mənzillərlə təmin edəcək”.

Orucəli Hacıyev deyib ki, sabahdan söküntü işlərinə başlanacaq: “Bu binanın yerində sakinlər üçün yeni bina tikiləcək”.

Fərid