Kərbəlada yaralanan zəvvarlarımız xəstəxanadan buraxılıb
01 fevral 2010 13:45 (UTC +04:00)

Kərbəlada yaralanan zəvvarlarımız xəstəxanadan buraxılıb

Kərbəla şəhəri yaxınlığında silahlı hücum zamanı yaralanan azərbaycanlı zəvvarlar müalicə kursunu başa vuraraq, mehmanxanaya yerləşdiriliblər.


Bu barədə APA-ya Azərbaycanın İordaniya və İraqda fövqəladə və səlahiyyətli səfiri Elman Araslı məlumat verib. Onun sözlərinə görə, səfirlik hadisə ilə bağlı dərhal İraq Daxili İşlər Nazirliyi ilə əlaqə saxlayıb və nazirlik azərbaycanlı zəvvarları aparan avtobusun Kərbəladan Samirə şəhərinə gedən yolda atəşə məruz qalması faktını təsdiqləyib.


Xatırladaq ki, silahlı hücum zamanı Azərbaycan vətəndaşı, 1994-cü il təvəllüdlü Leyla Əhmədova həlak olub, digər soydaşlarımız Müşfiq Abdullayev (1986) və Nüşabə Nəzərova (1975) yaralanıb.

Səfir yaralıların aldığı xəsarətin ciddi olmadığını, onlara ilkin tibbi yardım göstərildiyini bildirib: “Yaralılara Bağdadın Kazımiyyə rayonundakı xəstəxanalardan birində yardım göstərilib, sonra isə onlar mehmanxanaya köçürülüblər”.

Səfir terror aktı zamanı dünyasını dəyişən Leyla Əhmədovanın Nəcəf şəhərində dəfn olunduğunu bildirib.
# 240

Oxşar yazılar