Türkiyəli mafioz qardaşlar Bakıda həbs olundu

2004-cü ildə Türkiyədə “Söyləməz Qardaşları dəstəsi” kimi tanınan mütəşəkkil cinayətkar dəstənin məhkəməsi zamanı qaçan və İnterpolun qırmızı bülleteni ilə axtarışda olan Mehmet Sena Söyləməz və Mehmet Faysal Söyləməz qardaşları Azərbaycanda yaxalanıblar.

Lent.az-ın Türkiyə mətbuatına istinadən verdiyi məlumata görə, 6 ildir ki, axtarışda olan qardaşlar dəstə üzvü olan digər bir nəfərlə Bakıda ələ keçiblər.

İnterol ilə əlaqə saxlayan İstanbul polisi Söyləməz qardaşlarını təslim almaq üçün Azərbaycana bir qrup göndərib.

Qeyd edək ki, bu dəstə İstanbulun Eminönü rayonunun sabiq bələdiyyə sədri Əhməd Çətinkayaya sui-qəsd həyata keçirib, sabiq millət vəkili Sədat Bucağın tayfası ilə silahlı qarşıdurmaya gedib. Qardaşların rəhbərlik etdiyi cinayətkar qruplaşma 2003-cü ildə Muş vilayətinin Şəkər Fabrikini 5.8 trilyon lirəyə alan İrfan-Kudbettin Altay qardaşlarını öldürüblər. Həmin il Türkiyə polisi Söyləməz qardaşlarını və cinayətkar qruplaşmanın digər üzvlərini ələ keçirmək üçün Türkiyənin 16 rayonunda eyni vaxtda əməliyyat keçirib.

30 nəfər dəstə üzvü ələ keçib. Məhkəmədə dəstənin 4 üzvü barədə həbs qərarı çıxarılıb, Sena və Faysal Söyləməz qardaşları isə sərbəst buraxılıb. Prokurorluğun etirazından sonra qardaşların həbsi barədə qərarı çıxarılıb. Ancaq qardaşlar yoxa çıxıblar.